शब्दकल्पद्रुमः
महान्तः || पुं, (महत् + प्रथमाबहुवचनरूपम् ।)
नवधाभक्तियुक्तकृष्णभक्ताः । ते शिवशेषधर्म्मा- दयः । यथा, —
“शिवः शेषश्च धर्म्मश्च ब्रह्मा विष्णुर्महान् विराट् । सनत्कुमारः कपिलः सनकश्च सनन्दनः ॥ वोढुः पञ्चशिखो दक्षो नारदश्च सनातनः । भृगुर्म्मरीचिर्दुर्वासाः कश्यपः पुलहोऽङ्गिराः ॥ मेधसो लोमशः शुक्रो वशिष्ठः क्रतुरेव च । बृहस्पतिः कर्द्दमश्च शक्त्रिरत्रिः पराशरः ॥ मार्कण्डेयो बलिश्चैव प्रह्रादश्च गणेश्वरः । यमः सूर्य्यश्च वरुणो वायुश्चन्द्रो हुताशनः ॥ अकूपार उलूकश्च नाडीजङ्घश्च वायुजः । नरो नारायणः कूर्म्म इन्द्रद्युम्नो विभीषणः ॥ नवधाभक्तियुक्ताश्च कृष्णस्य परमात्मनः । एते महान्तो धर्म्मिष्ठा भक्तानां प्रवरास्तथा ॥” इति ब्रह्मवैवर्त्ते प्रकृतिखण्डे ६० अध्यायः ॥